由香港貿易發展局舉行的《香港．華麗秀2010》，前晚假灣仔會展隆重舉行，邀請中、港、日三地四位時裝設計師做騷，分別是香港代表何國鉦、北京的謝鋒和郭培，以及日本岩谷俊和。而專程來港的日本名模富永愛、中國名模莫萬丹、久未行騷的陳豪及本地一線名模包括周汶錡、楊崢和Lisa S.等行騷。出席嘉賓眾多，包括何鴻燊三太陳婉珍女兒何超雲、梁詠琪（GiGi）、蘇永康、梁漢文、古巨基、陳法拉、陳法蓉及Jessica C.等，星光熠熠！
「70後」的GiGi，穿上由何國鉦設計的桃紅色Deep V長裙，戴上價值逾千萬元的10卡重鑽戒及30卡重的耳環連頸鏈，性感高貴，艷壓全場！33歲的GiGi坦言，這身打扮相當性感，已黐滿膠紙防走光，她又笑言與何國鉦出場拍照時，感覺似結婚：「我出嚟嗰陣都驚驚哋！要步步為營，但為支持本地時裝，Deep V都在所不計。」她又自爆為了穿上這襲長裙而不敢喝水：「全晚要滴水不沾，條裙太窄，唔方便去廁所。（結婚都會性感？）一生人一次，唔露前都露後，但我仲未諗，依家感情生活OK！」
笑超蓮冇膽拖仔蜜遊
至於1989年出生的「80後」何超雲獨自現身，她穿上DRESS 33黑色斜膊的拖地長裙，露出誘人香肩，她表示一向支持本地創作，問到會否考慮自製首飾作慈善義賣？她說：「整得靚啲先啦！（用鑽石造？）唔係！只係首飾。（舖頭回本？）未呀！開咗一個月。」對於弟妹何猷啟及何超蓮的戀情各自各精彩，問到何時輪到她？超雲說：「唔知！遇到先算，唔會刻意特別搵！（搵男友有乜要求？）冇特別，之前都講過啦！」有傳超蓮瞞着母親私自與靚仔男友Jeremy遊日本，超雲聞言笑說：「冇咁大膽！」看來她睇透了妹妹的心思，而超雲更充當妹妹的「愛情顧問」，她說：「佢拍拖都有問我少少意見。（佢揀靚仔？）有靚仔梗係揀靚仔先！」問到賭王父親會否在農曆新年前出院？她說：「應該可以。（幾房人聚埋一齊團年飯？）應該會！可能出嚟一陣就返屋企。」另外，過往出席活動均敲響「警鐘胸」的Jessica C.，前晚則稍為收斂「讓賽」。
