昨晚出席勁歌頒獎禮的歌手均悉心打扮，本地時裝設計師的陳刀，對容祖兒的「自由神像」全身裙打扮，有讚冇彈，但大彈吳雨霏的打扮太驚嚇！勁歌總選頒獎禮，各歌手均悉心打扮儼如時裝騷。樂壇天后容祖兒身穿「自由神像」全身裙亮相，再度給人驚喜，陳刀說：「佢着得好好，好Sharp同有女人味，條裙好適合出席呢啲隆重場合，好似行紅地氈咁，勁有天后風範，簡單中見不平凡！」阿Sa則以Gucci打扮到場，令陳刀讚不絕口：「佢靚咗好多，女人味又多，髮型好襯佢，而且佢本身瘦底，好Trendy。」
至於身穿Alexander Wang紫色裙及YSL鞋的楊千嬅說：「條裙係老公（丁子高）揀畀我。」陳刀則說：「佢今次好穩陣，着得好靚同好瘦，紫色係佢幸運顏色，膊頭好特別、好有心思。」古巨基的打扮亦令陳刀眼前一亮，他說：「佢下身比較運動型，上身就斯文打扮，Mix & Match得好好，好鍾意佢對透明膠鞋，着得佢好靚仔、好高、好瘦。」
而鍾舒漫（Sherman）的打扮亦性感誘人，惟陳刀略嫌其下身太累贅：「上身OK，性感好睇，但下身好重，簡單啲會更加好。」
王菀之自暴其短
有讚亦有彈，陳刀首推全場驚嚇的吳雨霏（Kary）：「佢個唇太紅，個妝太濃，加埋少少黑色透視裝，個打扮比較適合陳曼娜着，佢着就太老積，唔適合佢。」而鄭融的全金打扮儼如「金師奶」上身，陳刀說：「佢好似師奶Hea出街咁，太過普通。」王菀之的疑似伴娘裙子則遭陳刀批評：「個高腰位太似大肚裝，加埋個襟花就似伴娘，佢應該加少少飾物，依家太寡，雖然佢露咗手臂，但真係唔算性感，仲暴露咗缺點。」
Profile
本地時裝設計師陳刀畢業於香港理工大學，03年舉行首個個人時裝展，曾為樂隊野仔、女歌手麥家瑜和李卓庭任形象及服裝指導，早前還「升呢」出書做作家。