最近Taboo與品牌Jump合作設計豪華版運動鞋，之前更到品牌在東莞的總壇參觀，獲紅地氈英雄式歡迎，大批美女夾道獻花送吻，他笑言感覺冇得頂，比BEP都厲害，感到很榮幸！提到做設計師，他滿肚密圈：「依家傾緊同Jump設計系列第二炮，我仲想擴充設計王國，除咗出鞋，仲諗住出黑超、帽同服飾等。」

去年結婚兼再做老竇的Taboo表示，其出生5個月的兒子Jalen很活潑，並主動騷愛兒的溫馨生活照，他指兒子較似媽咪，而他的16歲大仔Josh亦很生性，對弟弟照顧有加兼相處融洽。

Taboo的舞姿一向深受中國功夫影響，他自言12歲已是功夫迷，練了截拳道多年的他視李小龍為偶像：「佢係我最大嘅啟發，佢對影視圈影響好深，以前亞洲人弱勢，佢肩負和平戰士保護佢哋，冇人可以恥笑同欺負佢。」他更將其精神「魂戰士」紋在手臂上，而其武術底子亦是被睇中演《街頭霸王：春麗外傳》的原因，他希望多拍動作片。問到有否看過Rain的《忍者刺客》？他讚電影不錯：「我知佢係個歌手，我幾鍾意佢！」

爆Fergie明年造人

BEP獲格林美6項提名，Taboo希望在下月格林美頒獎禮直播中獲獎，為大豐收的09年錦上添花。他又自爆會再來港：「我哋應該喺年底嚟香港演出，就算唔得都會喺明年初。」他指各成員都忙於為下月展開的歷來最大規模北美巡迴綵排，盛傳巡迴後生BB的隊友Fergie，最快留待明年訪港後才「造人」。