徐子珊三線發展人氣急升，是非、緋聞亦衝着她而來，最近有傳她被富商照顧，指她撇男友搬進貝沙灣豪宅居住。日前子珊已強烈否認傳聞，並發誓不認識該富商，力斥報道失實，有如劇集《美麗高解像》的續集，將劇情投射到她的現實生活上。該富商的朋友英皇老闆楊受成，昨日出席相識十多年好友陳鼎禮與張敬軒的上契宴會。記者追問有關富商與徐子珊的緋聞，他表示緋聞不可信：「我都有睇報道，我同個富商好熟，大家係好朋友，我覺得單新聞唔好信亦唔可信。」

感激支持 努力工作

楊受成認為子珊根本不認識該富商：「第一，如果徐子珊係識佢嘅話，相信佢唔會豎起三隻手指對住電視機發誓啦！佢可以話：『唔識佢、唔識呢個人、從來未見過、我清者自清！』或者唔需要去解釋，冇必要豎起三隻手指發誓吖！」他認為娛樂圈是非特別多，才有這些八卦新聞，他說：「做呢行，坦白講圈中多是非、好八卦。徐子珊人又紅又靚，梗係多呢啲嘢啦！冇得避！我信徐子珊。（富商做生意出名，所以多人寫？）係囉！」

另一邊廂，子珊得悉獲楊受成力撐後，表示要感激對方，她說：「我唔敢講自己紅，可能近期因為頒獎禮而曝光多咗，我會繼續努力工作，做好自己。」