小小So睇住李彩華出道，當時已經覺得呢個小妹妹好適合喺娛樂圈發展。依家見到佢成熟咗好多，亦成功打開內地市場搵真銀，真係覺得佢好叻，眼光夠長遠一早識得返內地搵銀，總好過啲妹妹仔喺香港鬥到你死我活做紙上明星。
因為李彩華好多時間喺內地工作，想約佢出嚟見面都幾難。有次小小So喺中環撞到佢Shopping，佢一見到小小So就好興奮咁上前打招呼，真係念舊！冇見佢咁耐，佢外表成熟咗，但有一樣嘢冇變就係一樣咁鍾意買嘢。同佢一路行一路傾，已經不知不覺入咗好多舖頭，佢同小小So講：「你唔明啦！我好多時都唔喺香港，一有機會就要買番啲嘢補給。始終內地冇咁多選擇，有時剪綵出席活動都要搵件衫着吓，咁一有機會就入定貨，唔使失禮人！」小小So識佢咁耐都知佢唔係大花筒，係應使則使嘅慳妹，因為佢孝順，一個人撐起成頭家，真係要慳得就慳！