冇出唱片嘅吳日言（Yan），最近忙於為收費電視台主持飲食節目，仲學人出書教烹飪添！小小So有日見到佢，傾傾吓講起錄影節目嘅瑣事，大懵嘅Yan竟然畀人整蠱咗都唔知，笑到小小So收唔到聲！
Yan︰啱啱轉咗同吳嘉龍合作，原來佢好玩得，份人好百厭！有日我唔記得Logout Facebook，佢喺我唔留意嘅時候扮我留言，通知我啲朋友我紋咗身，搞到我電話響唔停，大家問我紋咗喺邊喎！
小小So ︰咁搞鬼？
Yan︰佢仲幫我覆番一啲喺Facebook回應咗我嘅朋友，話我紋咗喺啲好私人嘅地方，大家唔會睇到喎！搞到我鬼咁麻煩！第二日我咪問佢點解我紋咗身自己都唔知，點知佢淨係喺度傻笑囉！
小小So ︰同佢合作覺得點？
Yan︰雖然佢百厭啲，不過份人好Nice，佢都畀我發現咗佢嘅死穴，原來佢好怕人提起佢女朋友，我日後梗係識點做啦！哈哈！
所以小小So話齋，呢啲咪叫害人終害己，吳嘉龍千祈唔好再攪亂檔喇！