王秀琳（Mango）自被踢爆與郭富城遊車河後即升呢，但負面新聞隨之而來，先被指因城城事件與航空公司太子爺男友鬧翻，後又與黃曉明及所屬公司老闆曾文能傳緋聞，她否認與他們撻着，但強調「有人追」。

Mango日前在助手陪同下到中環連卡佛，並刻意架上黑超及將冷帽笠到實，似乎不想被人認出，但其「低調」打扮反而惹來不少目光。她先往女裝部睇高踭鞋，循例試了一對四吋高踭鞋後，即急不及待轉戰男裝部，細心挑選西裝褸、恤衫及領呔等男士貼身之物，明顯是在挑選禮物送給異性朋友。可能男伴鍾情「直間」，Mango不論恤衫或領呔都指定要直間紋，見她本來看中一件間條西裝褸，未知是否太貴，齋睇唔買，只折返恤衫櫃位，花了逾二千元買下一件淺藍色直間恤衫。

睇西裝褸	揀恤衫	再睇領呔 Mango到名店主攻男裝部，為新歡挑選禮物，心大心細，最後買得心水恤衫。

Mango再到男裝飾物部睇領呔及領呔夾，在玻璃櫃前左睇右睇，期間有男職員上前招呼，細心講解，但Mango唔多受落，逗留不足半分鐘即走人，此時她發現有記者在場，即打電話求救，問到是否買禮物給郭富城？她只說：「唔答呢啲嘢。」說罷即走入升降機離開。

鬼祟趕會男友

事後，Mango接受電話訪問時，又拋出令人充滿想像空間的答案：「係買畀公司同事。（老闆曾文能？）總之公司同事！」記者笑指她冧掂老闆，她不置可否：「佢係公司其中一位投資者，我係員工，公司搞嘅活動點可以唔出席，除非有嘢做。（佢特別照顧你？）唔好咁講。（車出車入？）畀人影到當日唔只得我同佢，仲有公司同事。」

另外，Mango早前接受電台訪問後準備截的士離開，未知是否趕會新歡，當她發現記者尾隨時，即走入商場藉人多成功甩身，似乎不欲新歡曝光。