現年48歲、身任地產代理公司董事總經理的廖偉強，平日經常接受財經記者訪問暢論樓市，但從未面對娛樂記者追問戀情事。他當日發現被偷拍後，起初甚為抗拒，但在記者再三要求下才接受訪問，坦承會在三、五年內與小曼拉埋天窗。
廖：廖偉強 記：記者
記：廖生可唔可以做個訪問？
廖：對唔住，我唔習慣被人追訪。（講幾句啦！）講真我唔係圈中人，何況我亦都唔鼓勵小曼做娛樂圈。
記：點解咁抗拒？以前同過圈中人拍拖？
廖：冇！只係我曾經接觸過呢個圈啲人，覺得呢行好複雜。（咁小曼呢？）佢係例外！小曼好純品，呢個圈咁雜，但好難得仲有人咁純品，所以小曼同亞視合約完咗，我都唔鼓勵佢再做藝人。
記：諗住結婚？
廖：係有計劃過同小曼結婚，但唔會係呢年內嘅事，我諗三、五年內。（見咗家長？）見過小曼媽咪。（佢點評價你？）小曼鍾意，伯母就鍾意！佢好尊重個女嘅決定。
記：計劃咗幾時生BB？
廖：呢啲太私人！唔好意思，我哋要走。