潮模Angelababy喺香港站穩陣腳，之後又成功攻日，雖然佢事業有成，但小小So認為佢絕對冇驕傲同擺架子，依然親切可人。話說，紅透港日兩地嘅Baby，經常因工作兩邊飛，佢話畀小小So知，有次佢喺日本做完嘢要漏夜趕返香港，點知個日本司機睇錯時間，令Baby送機尾。不過佢一啲都冇嬲，淨係同小小So呻驚趕唔切返香港做嘢，唔知點算好！
之後日本經理人公司幫佢Check到尾班機仲有位，就即場幫佢同助手買機票上機。個司機知道因為自己出錯而令Baby送機尾好內疚，所以瞞住Baby向佢日本經理人公司賠番兩張機票錢。Baby知道呢件事之後，覺得非常唔好意思，於是主動搵番個司機，仲畀番機票錢佢，個司機即場感動到喊！而在場嘅公司同事見到Baby嘅舉動都好驚訝。唔單止咁，小小So仲知道Baby驚個司機唔肯收番啲錢，所以親手畀番筆錢佢之後，就即刻走人！