憑一首《給自己的信》升呢的鍾舒漫（Sherman），率先在兩個樂壇頒獎禮大豐收，暫時合共奪得五獎，成績不俗。《給》在「叱咤十大」穩佔一席，她自言獲獎時淚流披面，真情流露：「真係好激動同感動！喊到好似小朋友，鼻涕都湧出嚟！今次係入行以嚟，喊得最犀利一次，但係喜悅之淚。其實一首歌嘅成功，唔係一人功勞，背後要有好多人支持同幫忙。」Sherman直言經過兩個頒獎禮後，心情已平復下來：「之前真係緊張到震，依家個心定好多。」
寫歌播正能量
一場版稅風波，導致無綫與四大唱片公司關係鬧不快，勢令「四大」歌手在《勁歌頒獎禮》的獲獎機會嚴重受挫。不過，Sherman對事件有另一番看法，她說：「獎項嘅嘢唔到我哋搞，結果係點都控制唔到，會接受個結果，總之有獎攞就證明首歌得到認同。」問到是否恨攞獎，Sherman說：「有獎係一個肯定，人哋唔會立亂頒個獎畀你，真係見到你勤力先頒獎畀你。」
由於《給》的成績理想，會否對下張唱片構成壓力？Sherman說：「都有，我想超越《給》嘅成績，但結果點冇人知，我會更加發力。（炮製快歌？）快慢都會有，依家我發覺歌詞係緊要到不得了，因為易引起共鳴，緊扣人心。（自己填詞？）要再操練吓先，依家未係時候。」信奉基督教的Sherman有一顆感恩的心，獲獎除了感謝神外，還感激師姐容祖兒與蔡卓妍的鼎力相助。問到會否考慮灌錄福音唱片，她說：「我都想，但就算出唔到，新碟都要有正能量傳畀歌迷。（唔唱悲情歌？）悲情得嚟都要有訊息，傷感過後總有明天。」
未敢發「紅館夢」
對於獲撐做「英皇一姐」，Sherman聞言即謙虛地說：「吳雨大哥嗰日爆出嚟，呢個心我好Appreciate（欣賞），但我仲未有資格做呢樣嘢，唔想畀名銜困住自己。」談及「紅館夢」，她直言仍遙不可及，今年才出道第四年，希望再繼續唱多些好歌。雖然事業發展暢順，但感情生活仍然交白卷，Sherman說：「一旦墮入愛河，我必定會抽時間拍拖。（要基督徒？）如果係就最好，大家有相同價值觀，若然對方唔係基督徒，但我對佢有感覺，都會可以發展。（相睇？）咁又冇，屋企人唔興呢啲嘢。」
化妝：Zoe Fan@www.zoe-fan.com
髮型：Daniel & Wil@Chin.G