在樂壇打滾逾20年的克勤，經歷了不少風浪，今次無綫與四大唱片公司因版稅而鬧糾紛，至今仍未平息，令「四大」歌手無奈「壯烈犧牲」，連「無綫契仔」克勤亦不能幸免，無奈也無言。
克勤原本有機會在《勁歌優秀選》第三回獲獎，但撞正版稅風波，結果捧蛋而回，令他未有歌曲入圍《勁歌頒獎禮》！他的全新專輯《Threesome》剛面世，惟無綫亦冇派員採訪記者會，變相減少了宣傳機會，認真慘情！不過，克勤對無綫忠心耿耿，加上對今年世界盃主持一職虎視眈眈，早前在記者會便拒絕接受有線單對單訪問，更搞笑地以外套遮面，證明對無綫仍一片丹心。
天倫樂最重要
先後三奪無綫「最受歡迎男歌星」及一次「金曲金獎」的克勤直言，早幾年對獎項仍存壓力：「最大壓力係02、03年，因我好想攞到（男歌星獎），所以會容易介懷，但依家結咗婚兼有小朋友，會畀多啲時間陪佢哋。（工作心態唔同咗？）唔係好大分別，只係想搵多啲錢、做少啲，我諗好多人咁諗。（達到目標？）梗係未！最理想係唔使做，但收好多錢，好似林夕咁！」對於被稱為「神級歌手」，克勤謙稱不敢當：「樂壇比起以前多咗商業味，好多嘢係用錢同講錢，但又無可厚非。」
幸福男人典範
撇除因版稅風波而引起的爭拗，克勤在樂壇星途暢順，加上有幸福美滿家庭，早前太太盧淑儀再度懷孕，今年會添多個「虎寶貝」，問到是否幸福男人典範？他笑說：「唔識點去Define（釐定）幸福，但我係開心同知足嘅！（遊戲人間？）我唔得，我唔同阿倫（譚詠麟），佢係工作等如娛樂，我就工作還工作、娛樂歸娛樂。」克勤雖與阿倫是最佳拍檔，但性格卻南轅北轍，他說：「佢24小時都會娛樂人，天跌落嚟當被冚！我反而會杞人憂天。」
談及新專輯，克勤表示全碟歌詞由填詞人林夕及林若寧包辦。新歌《寂寞嘍囉》流露了男人也愛吐苦水，但克勤自言不需要：「除咗鼻涕之外，其實我過咗『呻』嘅階段。」
攝：秦健輝
化妝：Angel
服裝：Henry Lau@SPY
髮型：Adolph
場地：灣仔君悅酒店