樂隊Mr.原本於昨午1時45分出席在銅鑼灣舉行的活動，但最終2時半才現身，令在場十數名記者呆等45分鐘，期間公關不斷以「嚟緊」及「行緊嚟」Hea答。一身便服打扮的Mr.乘坐保母車到場，落車時還與歌迷「喪傾」一輪，才施施然過馬路進入會場，隨即沙冧說：「唔好意思，對唔住！」

送MJ睇醫生

成員Alan解釋遲到原因：「因為MJ唔舒服，所以車佢去醫院睇醫生，見佢個樣紫晒，加上佢又畫咗眼線，真係好恐怖！」問到明知遲到為何不「跳車」？他解釋牽強：「初時有咁諗，不過呢度好塞車，加上又近隧道。（係咪升呢？）唔係，唔知升呢點解，我哋係Try My Best。」知衰的四子再次道歉說：「真係唔好意思，要大家等。」

另外，環球唱片發言人透露MJ因感冒菌入腸而屙嘔大作，現時已返家休息：「醫生問佢留唔留醫，佢話想返屋企，所以依家返咗屋企休息。（停工？）今日（即昨日）嘅活動佢都唔會出席，嚟緊要睇佢病情再決定。」