任達華早前被指去年12月底在杭州出席活動時，與一名女子過從甚密，更被拍得齊齊站在酒店門外。雖然華哥澄清該名女子只是工作人員，但昨日有內地網民爆料指該女子是內地演員周詩雅！華哥得悉此事大感愕然，他說：「冇可能！唔該攞啲證據出嚟，啲報道話喺酒店影到我，咁就最好喇！有錄影帶為證，攞出嚟大家咪知咩事囉！」他並強調不認識周詩雅。

周經理人指認識多時

由於華哥對事件感好奇，隨即致電當日安排他到杭州工作的中介人小秦查問，得知周詩雅原來是小秦的朋友，華哥才想起當日確曾見過對方：「佢真係好熱情，但因為唔識佢，所以冇乜印象。我記得本來只係小秦陪我返酒店，點知個女仔跟喺後面，我即刻同小秦講，同個女仔一齊返酒店唔好，仲話如果個女仔冇地方住，不如另外安排地方畀佢！呢個女仔係好有電力，但佢電個木頭人就梗係唔過電啦！」至於華哥太太琦琦亦認為事件得啖笑。

不過，周詩雅方面卻說出另一版本，其經理人雨田指她四、五年前曾與華哥合作，但未能講出是甚麼合作，只堅稱兩人認識多時，並指華哥每次到北京也會約她吃飯。而小秦昨日則主動致電記者，力撐華哥是遭人擺上枱：「那天飛機誤點，我委託了周詩雅替我接待華哥。據我所知她下月會有新劇推出，感覺上她是乘機宣傳。我曾致電周小姐，豈料她Cut線。（雨田指兩人認識四年？）一派胡言。」

華哥昨晚抵達北京後即致電記者，得悉周詩雅經理人的言論後即說：「合作過拍劇？邊套劇呀？真係冇印象喎！再咁落去，我考慮日內喺深圳開記者會澄清。」

另外，除了解釋有出入外，該段爆料文章亦離奇地以極大篇幅講述周詩雅的演藝事業，似宣傳多於爆料。

Profile

姓　　名：周詩雅

外　　號：琵琶精

身　　材：34D、24、34

出道經過：畢業於北京電影學院，憑驕人身材上位，接拍《別樣警花》及《邊緣追緝》等劇。