無綫《東張西望》節目主持龔嘉欣，早排出席聖誕活動，小小So都有湊熱鬧去睇，向來有心思嘅佢，今年聖誕就自製薑餅送畀朋友，佢焗薑餅時，仲唔小心畀個焗爐「辣」傷手，嘉欣話：「我今年花咗4、5個鐘，焗咗100塊薑餅，希望朋友收到會好開心。其實我好鍾意整甜品，每逢有特別節日，例如朋友生日同情人節，都會親自整甜品，我覺得好過送禮物。」
不過，嘉欣就向小小So狂呻，佢話咁多年嚟，都未試過有人整嘢食送畀佢，佢話如果有人煮餐飯或者整甜品畀佢食，會覺得好Sweet。雖然嘉欣仲未有機會收一份咁Sweet嘅禮物，但有一年嘅聖誕禮物都令佢好難忘，佢話：「我好鍾意熊仔公仔，早幾年，爹哋媽咪送咗個好似我差唔多高嘅熊仔公仔畀我，真係好開心，我一直放喺睡房。」