（10分滿分）

陳慧琳．撞色奏效 8分

Kelly呢身Chanel春裝背心短褲打扮，簡單得來又好高貴，本來灰銀色嘅衣飾，感覺會偏向成熟，但佢就着對Chanel綁帶Boot，玩吓撞色，效果出奇地好，亦可以騷吓佢生完都唔肥嘅長腿，令整體感覺好有潮流感。

鍾舒漫．In爆形象 8分

我覺得鍾舒漫可塑性好高，着到一啲型格嘅衫，自從佢轉咗形象愈嚟愈好，呢身打扮好有日本Rock妹Feel，而佢着咗今年大熱嘅Over-the-knee Boot（過膝靴），呢類Boot可以令對腳顯得好修長，衣着方面就要襯啲超短裙或短褲先好睇，好似鍾舒漫咁着就好In喇！

蔡卓妍．型格十足 7分

阿Sa着衫不嬲都好有自己風格，高貴形象又得，呢身中性打扮亦好型，最出色係對毛毛Boot，個長度啱啱好，又唔會顯得好臃腫。

何超蓮．青春無敵 7分

超蓮好青春，而佢呢對Boot嘅長度啱啱好，配短褲可以騷吓長腿，而且對鞋有豹紋圖案，令成個感覺有型啲，冇咁單調。

江若琳．打扮出色 7分

江若琳成身打扮嘅重點都喺下半身，就係對Leggings加對毛毛Boot，上身件衫又有啲淺色圖案，令整體感覺唔會太沉色，雙腿亦顯得好瘦。

楊愛瑾．簡單好看 6.5分

楊愛瑾（Miki）一向都鍾意Sell長腿，佢呢身打扮都幾好睇，簡簡單單一條連身裙襯毛毛短Boot，加埋冷帽，好有冬日感覺，亦可以盡騷長腿。

傅穎．對腳好短 5分

傅穎（Theresa）本來呢身打扮都幾可愛嘅，毛毛頭飾襯毛毛Boot，好有日本女生Feel，不過對毛毛Boot嘅長度有啲尷尬，依家顯得對腳好短，改穿短裙就更好。

謝安琪．妝容唔襯 5分

謝安琪最錯係條彩色Leggings，令雙腿肥到不得了，本來件衫幾型，佢個妝又化到好甜美，如果要玩Rock味就要去盡啲，連個妝都換吓Smoky Eyes會好好多。

G.E.M.．雙腳短粗 4分

18歲青春無敵嘅G.E.M.，成日都收埋自己嘅優點，好似呢身打扮就娘味十足，對毛毛Boot令佢本來唔長嘅雙腳，顯得又短又粗，佢仲要用大褸遮住出眾嘅身材，如果打開件褸會好少少。

官恩娜．打扮太Out 3分

官恩娜本身係一個好Sweet嘅靚女，但呢身打扮令佢「出事」，呢個Look實在太Out，對長Boot嘅Cutting好鬆，修唔到佢嘅腳形，如果換對Ankle Boot會好少少。

楊千嬅．累贅驚嚇 0分

千嬅呢條金色連身裙鬆泡泡，太多層次，佢唔應該着呢類衫，顯得好肥又幾驚嚇，件衫咁金，搞到佢好成熟，本來佢對Boot幾特別，不過加埋上身就超唔掂，好累贅。

鍾嘉欣．手套出事 0分

鍾嘉欣呢身打扮真係好唔掂！上身白恤衫太闊，黑色裙又好闊好長，冇晒身材同線條，而最恐怖係加咗對黑手套同黑色Boot，遮到實一實，好似大咗一個碼咁！

Celia's Profile

身為時裝界達人的黃欐堯（Celia），畢業於理工大學設計系，是陳慧琳好友兼御用形象顧問，曾與不少藝人合作，包括謝安琪、孫耀威和江若琳等。