樂壇第二張成績表《叱咤樂壇頒獎禮》爆出驚人賽果！在無綫與四大唱片公司版稅風波籠罩下，即將舉行的勁歌總選，預計四大唱片公司將全軍覆沒，然而環球卻成為《叱咤》大贏家，陳奕迅（Eason）更連奪五個大獎，令他在傳媒大獎遙遙領先！

但環球與商台的關係千絲萬縷，環球高層黃劍濤（登勤），與商台助理總經理甘菁菁是夫妻，而前商台DJ卓韻芝與環球旗下的Mr.結他手MJ是情侶，DJ朱薰更與Mr.成員Dash的孖生細佬在今年拉埋天窗，令不少歌迷及網友質疑有瓜田李下之嫌。

讀者力斥有欠公允

本報昨日收到不少讀者投訴，指《叱咤》賽果有欠公允，認為登勤與甘菁菁關係非常，加上甘菁菁曾是Eason的經理人，私交甚篤，況且環球在《勁歌》總選料得獎不多，故才出現環球在《叱咤》的賽果。同時，不少網民在討論區替祖兒抱不平，認為祖兒既奪女歌手金獎，為何以播放率計算的《叱咤》，連一首金曲也打不入專業推介十大，大替祖兒不值！

雖然祖兒失落歌曲獎，沒有影響她在慶功宴上的心情，她強調不會為此感到不開心：「當然唔會唔開心，我都戥攞到歌曲獎嘅歌手開心，包括何韻詩、鍾舒漫、RubberBand講感謝詞，我都喺台下喊到豬頭，哈哈！其實如果我攞女歌手銅獎都執番身彩，依家攞金就更加完美！」談到在傳媒大獎落後，祖兒說：「我冇計，仲有餘下兩個頒獎禮，我都有信心！」

吳雨：公道自在人心

記者昨日致電甘菁菁，談到有歌迷質疑商台偏幫環球，她說：「我做咗叱咤6年，每年Eason攞金獎都會話因我哋有關係先攞獎，咁對Eason好唔公平，舊年佢攞唔到大獎就冇人講，Eason喺當今嘅樂壇成就有目共睹，唔使有任何人幫！（祖兒、方大同、薛凱琪、Mr.失落金曲獎？）睇番過往，唔係今年先有咁嘅情況出現，祖兒曾幾何時攞女歌手金獎都冇歌打入十大，喺呢個機制唔出奇。」甘菁菁強調只要歌手成績好，商台不會因是非而不頒獎給歌手。

對此英皇行政總裁吳雨則說：「我唔相信有咁嘅事。（登勤同甘菁菁關係），相信佢哋會公私分明，亦唔希望有呢啲事發生，相信頒獎禮機制唔係一個人去決定！」但對於祖兒失歌曲獎，他坦言有點失望：「係有少少失望，祖兒同基仔喺過去一年成績都咁好，係有目共睹，公道自在人心，每個頒獎禮都有佢嘅機制，機制係人為，今次賽果確係有啲失望，祖兒隻《搜神記》咁好，連歌曲獎都冇！」