李逸朗（Don）早前返內地拍劇，小小So知佢返嚟香港，即刻約佢食飯，見到佢真係嚇咗一跳，因為原本已經好瘦嘅佢，竟然仲瘦咗兩個圈！阿Don見小小So咁擔心，佢即刻話：「我唔係有病，只係食唔慣內地嘢， 喺北京日日淨係食饅頭，我又唔鍾意食咪瘦成咁囉！」小小So叫佢盡量食多啲，不過佢話已經肥唔番：「我都想食番肥啲，不過好似冇乜成績！」佢仲話喺北京遇過3場雪，點知3次都病咗 ：「都唔知做咩身體咁弱，不過啲雪真係好靚，感覺都幾得意！」
阿Don話遲啲又要再返內地拍劇，仲話依家搵嘅錢夠養家，所以個人零舍開心：「除咗食嘢唔係好慣之外，我已經好習慣喺內地生活，不過有時太耐冇返屋企，今次返嚟，阿媽第一句就話：『你仲記得有阿媽咩？』遲啲又要去四川拍劇，所以依家都盡量抽多啲時間陪佢！」果然夠孝順！