早前來港出席法國電影節的安娜表示，兩年前曾來港參加一個藝術展，但沒有太多時間四處去，只去過山頂、銅鑼灣與九龍：「香港有啲似蒙地卡羅！」安娜不但是演員，還是Chanel品牌的模特兒，故對飾演其品牌創立人香奈兒大有幫助，她說：「我幫Chanel做咗7年模特兒，期間做咗唔少資料搜集，連裁縫細節都有研究。睇住Chanel首席設計師Karl Lagerfeld做嘢好有趣，了解佢點得到靈感，學到好多音樂、繪畫同文學嘅知識。嗰時我仲未知道呢啲準備工夫會對我日後做嘅角色有幫助！」

與Mads擦出火花

安娜表示與法國導演甄古南合作很有驚喜，而與飾演史特文斯基的Mads Mikkelsen合作則很有火花：「我哋角色都係好自負嘅人，準備角色時做過好多討論，嘗試搵個戲劇衝突點，好好玩！」

吸血題材作靈感

原來曾執導短片的安娜，明年將首次執導一套長片：「做導演好好玩！我嘅電影係關於一個16歲少女同吸血鬼嘅愛情故事，不過吸血只係隱喻。」安娜表示也看過另一套香奈兒傳記電影《少女香奈兒》，但笑言感覺很奇怪：「我喺度諗，嗰個明明係我角色，係我嘅台詞！」

甄古南讚吳宇森：佢拍嘅係藝術片

《香》片法國導演甄古南（右圖）大讚安娜神態似足香奈兒：「佢亦好有自己見解，不過最後都搵到個溝通方法。」他指今次拍戲與慣常做法不同，沒有做太多事前準備：「我採用紀錄片嘅風格，到現場先決定攝影機擺位，畀演員更大發揮。」至於最喜歡的華人導演，他首推吳宇森：「你哋覺得佢拍商業片，我哋法國人覺得係藝術片！我都鍾意不斷轉變風格嘅李安，我又曾經喺舊作向王家衛致敬！」