前晚銅鑼灣時代廣場舉行《除夕倒數愛香港迎2010》活動，請來陳奕迅（Eason）、謝安琪（Kay）、容祖兒、蔡卓妍（阿Sa）、張敬軒及王菀之等迎接2010年來臨，大會即場頒發「第三十二屆十大中文金曲」的「優秀流行歌手大獎」，今年的十優歌手增至十三優，包括古巨基、祖兒、阿Sa、林峯、Eason、Kay、軒仔、樂隊Mr.、楊千嬅、衞蘭、王菀之、方大同及G.E.M.。

近日備受氣管敏感困擾的祖兒，與市民迎接2010年。	Eason攬完祖兒，再攬軒仔，但Kay卻只能在身邊眼望望。	放大圖片

讚Mr.有實力

被指在《叱咤頒獎禮》成為大贏家的Eason全晚心情勁靚，倒數時更興奮衝落台，幸工作人員把他拉回台上站在Kay身旁，未知是否避嫌，Eason未有企定定，反而走到祖兒身邊倒數。於2010年來臨一刻，Eason更主動與身旁的祖兒及軒仔來個「愛的抱抱」，雖然Kay站在軒仔旁邊，但Eason卻未有理會，反而轉向身後的歌手，Kay惟有與身旁的軒仔抱抱。對於有傳李克勤因版稅風波與環球發生爭拗，變相令Mr.奪獎，Eason聞言即作「O嘴」狀：「吓？唔信有咁嘅事，好快就會解決到！（影響曝光率？）依家啱啱好，有時我喺電視見得自己多都想嘔！」他大讚Mr.有實力，因出道僅2年已能打入十優。

G.E.M.（左起）、衞蘭及阿Sa搭晒膊，十分老友。	Kay慘被Eason忽視，惟有落力獻唱自娛。	由於大會誤播咪嘴版，逼得基仔要用力獻唱。

基仔險變咪嘴

另外，基仔上台獻唱時，大會誤播咪嘴聲帶，令基仔要落力獻唱，以真聲蓋過聲帶。而單飛後首次奪得十優的阿Sa開心地說：「今年做咗好多嘢，第一次特別難忘，所以唔會忘記今日。（繼續單飛？）好快就同阿嬌有合作，Twins唔係解散，所以唔係復合係重聚！」祖兒亦為阿Sa奪獎感開心，而她又自爆近日喪咳兼飽受氣管敏感困擾。

此外，《十大中文金曲》製作總監周國豐及大會總監馮偉棠表示，因出現同分情況，故十優增至十三優，他們認為在不景氣的時候應給予歌手更多鼓勵，才決定頒發十三優。