29/12/2009

播放本新聞相關短片

爆炸堂:老婆要影婚紗相 祥仔耍手擰頭

黎耀祥今年由男配角「升呢」做男主角,仲憑《巾幗梟雄》攞埋視帝,唔少廣告同商場騷都排住隊搵佢,荷包脹咗,梗係要買禮物獎勵自己同屋企人啦!但據小小So所知,祥仔老婆最想收到嘅禮物係一家人去影樓影輯靚靚婚紗照,無論老婆點氹,祥仔都唔肯就範。

小小So:祥仔今年搵多咗,有冇買禮物畀自己?

黎耀祥:梗係有,買咗套高質Hi-Fi放咗喺大廳,又送咗部手提電腦畀老婆。

小小So:咁囝囝呢?

黎耀祥:佢嗰份最貴,佢睇中部幾萬蚊嘅相機連鏡頭,睇到咁貴都諗住唔買,但見個仔同個Sales傾到頭頭是道,就買畀佢!

小小So:個仔都咁重手,老婆實好大份啦?

黎耀祥:唉……

Julia:(黎太Julia搶答)我想同佢影輯婚紗相,當年結婚都有影,不過依家唔同,個仔大咗,加上佢身形Fit咗,諗住再影一輯,但佢係都唔制。

黎耀祥:平時已經要影咁多相,真係咪搞!

Julia:我求佢好耐都唔肯!

黎耀祥:真係唔好呢!

小小So見黎太咁想影,都忍唔住幫口,搞到祥仔索性掩耳扮聽唔到,真係激死人!