趙式芝近排愛上Golf，日前同小小So飲茶，一見到面就好開心咁同小小So講佢打Golf嘅偉績：「我一定要同你分享，我之前去打Golf，打出咗一桿入洞，初初成個人呆咗，唔識得反應，後來開心到跳起，不停狂笑，成個傻晒！可惜當日只有一個人打，身邊冇人可以同我分享。之後我去咗會所餐廳，不停咁同人講，跟住請餐廳嘅人飲嘢，因為一桿入洞係要請人飲嘢，啲人會為你慶祝。」
趙式芝仲話之後即時打畀媽咪姚煒，媽咪初初都唔信，後來知道都大叫！小小So問有冇打畀爹哋趙世曾，趙式芝話：「有，爹哋好冷靜咁教我去登記，到時會有人送禮物畀你。跟住爹哋問我有冇買Golf保險，原來如果我有買保險，保險有得賠，會畀獎金獎勵，可惜我冇買，但知道之後，依家已經買咗。」小小So聽到都戥佢高興，仲話下次再飲嘢要開香檳慶祝。