Q：記者 佘：佘詩曼

日常篇

Q：每日必定帶甚麼出街？

佘：一定係電話、糖同唇膏！雖然我唔係太鍾意甜，不過久唔久就要食一粒，因為食糖可以令人開心。

Q：最注重自己哪一部分？

佘：一定係手！一雙手好易睇到一個人嘅年紀，所以我由細到大都唔洗碗，就算以前媽咪畀200蚊叫我洗碗，我都冇理佢。

Q：最想學是甚麼語言？

佘：日文！因為我好鍾意日本買嘢，識日文又可以講價，問路都容易啲。

社交篇

Q：第一眼會留意人哪一部分？

佘：眼！睇人對眼就知道佢講真話定假話！

Q：最討厭是甚麼人？

佘：我最討厭係冇責任感嘅人！呢啲人虎頭蛇尾，嚴重影響工作進度，最慘係要其他人幫佢做埋。

飲食篇

Q：最喜歡飲品？

佘：珍珠奶茶！最好加胚芽。

Q：最喜歡食甚麼？

佘：榴槤同大閘蟹！雖然會食到皮膚敏感，但我鍾意食。

Q：最討厭食甚麼？

佘：金菇牛肉卷！細個同媽咪食日本嘢，食到飽飽仲剩番八件金菇牛肉卷，媽咪仲要我幫手食，最後食到嘔，自此就唔再食金菇牛肉卷喇!

自身篇

Q：最長唔瞓紀錄?

佘：四年前內地拍《乾隆下江南》嗰陣，試過五日四夜唔瞓，真係拍到靈魂出竅，企喺度都瞓着，拍到第三日已經麻木晒，唔知自己做乜。

Q：最尊敬是誰?

佘：我最尊敬嘅人係我六年級嘅班主任，自己Maths（數學）不嬲都好差，但佢都不厭其煩放學幫我補課，今年年頭我搵番老師同佢食飯，雖然已經80幾歲，但依然好精神。