陳奕迅玩威脅
緋聞男女Eason與Kay近日經常在公開場合碰面，帶病上陣的Eason對Kay甚為避忌兼全程黑面，其實他只是不滿女兒被騷擾：「係咪要搞到我唔做呀？」
解讀：
Eason你千祈唔好亂講嘢！除咗歌迷會第一時間出嚟遊行之外，你唔做嘢點養得起老婆同個女呀？佢求其一個袋都貴過打工仔成年人工o架！
黎耀祥扮謙虛
出爐視帝祥仔除咗忙於出席祝捷會外，同時亦繼續拍攝處境劇《畢打自己人》，新年則到美加登台：「依家接Job身價會以倍數增加，以前接咁多嘢做，都係因為我平、廉價勞工咋！」
解讀：
原來攞完視帝嘅分別真係咁大，唔怪得咁多人爭呢個獎啦！如果連祥仔都係廉價勞工，咁香港真係冇乜人係高收入人士喇！
鄧萃雯出口術
視后雯女與影迷在街頭慶祝時表示，頒獎禮當晚搏到盡，希望膺視后答謝Fans：「就連臨尾宣布女主角一刻，司儀問我有冇信心攞獎，我都撐話有十分信心！」
解讀：
背後有咁多人撐你，雯女唔使自己撐自己啦！你估無綫唔驚市民遊行咩？連楊怡都話雯女輸咗會去遊行，可見雯女冇得輸！
莫文蔚得把口
最近加盟環球的莫文蔚在記者會上春風滿面，被問到是否以天價加盟？她笑說：「講心唔講金！做音樂要啱傾，有錢都未必做到好創作！」
解讀：
如果真係有心創作，就應該學林一峰孭住個結他去歐洲攞靈感，淨係戴住九十幾萬鑽飾，真係好難令人信服囉！
古天樂搞爛Gag
早前古仔簽下貝沙灣豪宅的臨時買賣合約，因而被取笑愛「儲樓」不愛「儲玩具」，他即以爛Gag解圍：「衫鈕呀？間屋我買嚟同屋企人一齊住o架！」
解讀：
古仔，莫非你粒衫鈕值千幾萬？如果係咁，到時啲人應該唔理你買咗層咩樓，而係爭相去欣賞你粒「世紀之鈕」喇！
王秀琳謝晒皮
王秀琳早前表示今年會過一個寂寞的聖誕節，被問到會否抽空見城城時，她一改平日敢言的態度，大晒V字手勢及「Yeah」一聲說：「唔想再講！」
解讀：
次次都發表攻城「偉論」嘅王秀琳終於唔想再講，係咪見人哋公開關係，驚覺自己大勢已去先唔講呢？