台慶劇《宮心計》收視爆燈，前晚再由佘詩曼、楊怡、鄭嘉穎與陳豪夾錢筵開五席慶功。因獲獎而令彼此Fans展開罵戰的楊怡與阿佘，首度公開碰面，但友誼未受影響，還即場扮咀嘴兼搭膊頭。楊怡被指禁慾三年，阿佘即力撐，她說：「禁『浴』？拍《宮心計》嗰時佢仲有沖涼，個身唔臭！（佢同黎諾懿拍拖？）佢拍拖冇理由唔同我講，男同女可以做朋友啫！（你冇獎心情低落？）新劇個角色好沉鬱，所以好少笑。」楊怡亦否認禁慾傳聞，又指因黎諾懿陪買相機而傳緋聞感到無奈。

想開拍續集

另一邊廂，《富貴門》前晚播出大結局，但只由薛家燕找朋友贊助十三席，與呂良偉、袁詠儀（靚靚）及戚美珍等台前幕後「自己友」食飯慰勞一番。對於收視不理想，靚靚說：「我不嬲都有期望，但收視好難控制！（網民批評場強姦戲！）咩意見都會接受，只要唔係人身攻擊就得。」家燕姐亦強調《富》劇在廣東省收視第一，問到有否想過原班人馬再合作？她說：「想㗎！但我九月至有期！我怕夏天開工辛苦，諗起陳鴻烈就唔想扯得咁行。」