剛過去嘅11月，本港氣溫曾經跌到得十度左右，又凍又乾燥，女藝人為咗上鏡靚靚，紛紛諗計仔禦寒同護膚，江若琳（Elanne）亦唔例外，除咗出動暖爐同暖氈外，仲教大家點樣暖笠笠咁敷面膜！
小小So：你怕唔怕凍o架？早排咁凍，喺屋企係咪用被包住自己？
Elanne：我係勁怕凍嘅人，喺屋企會開晒暖爐，瞓覺前又會開定暖氈，等到張氈暖晒先會閂咗佢上床瞓；同埋我沖涼都會拎埋部暖爐入去開住，咁就冇咁凍啦！
小小So：冬天係咪少咗敷Mask？
Elanne：梗係唔係啦！我依然Keep住敷o架！好多人話冬天敷Mask好凍，等我教大家一個方法啦！只要將塊Mask放喺暖水度，過幾分鐘先敷上面，咁就暖暖哋、好舒服o架喇！一啲都唔凍o架！
小小So：咁凍天氣，你隻狗點保暖？
Elanne：佢不知幾醒呀！我每次一開暖爐，佢就企正喺暖爐面前，有時仲會跳上我張床吸我啲暖氣，好搞笑o架！