徐子珊、伍詠薇、梁政珏和曹永廉等，昨日為新劇《美麗高解像》宣傳。對於被指遭伍姑娘與陳敏之聯成一線「蝦」的子珊急忙澄清：「今次個角色好難演，心路歷程變化大，加上拍嘅時候身體唔舒服，所以有喊。（入行以來最難演嘅角色？）係呀！我覺得自己未Handle得好。（畀自己幾多分？）留番監製講啦！」

伍姑娘同樣否認「蝦人」，反呻自己當新人時曾遭白眼：「蝦人？哈囉喂我就有！我係鱷魚頭老襯底，讀書時更加有同學話睇我唔順眼，結果十四個人圍埋一齊話要打我，結果其中一個同我隻揪，成身損晒返到屋企，惟有同阿媽講話自己仆親。」

梁政珏性感搶鏡

伍姑娘受訪時，梁政珏突然以性感Tube Dress殺到，不少記者轉移目標去拍照，伍姑娘見狀即搞笑地說：「你哋返嚟啦！」但她亦讚對方身材好。而梁政珏則否認刻意性感搶鏡：「配合角色啫！戲裏面我勾引王祖藍同黃長興，其實條裙我選港姐時着過，不過當時冇人登！」雖然她表示已做足安全措施，但又不時當眾抽裙免下滑，更自爆：「之前擔心前途，成個人好唔開心，結果搞到入咗醫院，可能瘦咗囉！」