小方昨日與緋聞女友兼好拍檔鄧麗欣（Stephy）出席活動，獻唱最新合唱歌《七年》外，又換上一身古裝打扮上演搞笑短劇，氹得現場觀眾和歌迷笑逐顏開！對於港足在東亞運中擊敗日本歷史性奪金，小方儼如置身其中般興奮，他表示雖然在東亞運舉辦過程中飽受抨擊，但奪金牌足以證明應該舉辦：「冇人應該反對，巿民嗰份喜悅同投入感，就算蝕咗錢都唔緊要啦！（你有份畀喎？）是但啦！運動可以令人民團結。」

SMS為泳隊打氣

談到港足功臣陳肇麒（陳七）最近緋聞纏身，與無綫藝人李綺雯及女友的戀情被廣泛報道，小方出言力撐：「運動員冇所謂啦！C朗都好多花邊新聞啦！最緊要為港爭光，落場見到真功夫。」此外，小方表示因本月5至10日在北京錄音，未有親身到場欣賞其他賽事，但他亦有透過SMS為港泳隊好友打氣，以及在內地電視台觀賽。

至於Stephy透露有收看港隊奪金賽事：「有睇12碼，雖然唔係球迷，都好開心，自己仲有留意排球賽事，以前嘅隊友都有出賽，雖然輸咗，但知佢哋盡咗力。」她表示若非入行當歌手，亦希望有機會可代表香港出戰國際賽事。