在人潮密集的銅鑼灣駱克道行人專用區，前晚發生「鏹魔」掟鏹水彈事件，導致六人受傷，引起群眾恐慌；而同樣人流如鯽的旺角區，年中亦曾發生掟鏹水彈事件，造成多人受傷，人心惶惶！不過，昨日趙碩之、戴夢夢、o靚模E Cup Baby（劉欣宜）和陳若嵐（Melody）、大名娛樂老闆林建名及隨行保鏢等重臨「險境」，出席在旺角行人專用區舉行的《第三屆星際城市攝影比賽頒獎禮》，活動吸引數百市民和龍友圍觀，雖有保安維持秩序，但仍有龍友企在欄杆拍照，擠得水洩不通。
夢夢轟狂徒正人渣
林建名坦言不擔心鏹水彈事件再發生：「唔驚！對香港政府有信心。」問到是否他叫大會搭建帳篷？他直認不諱，又謂注意安全是應該的。當夢夢和碩之等在布景板前影完相後，便急急腳返回帳篷內躲避以策安全。碩之說：「一路行嚟嗰陣，我都周圍望吓有冇人拎住膠樽，好開心林先生支持我哋。」她又自爆前晚仍未得悉銅鑼灣發生鏹水彈事件，她抹一把汗說：「我返屋企之後就出去睇戲，點知銅鑼灣封路，後來先知發生乜事。」而夢夢則說：「好Surprise，林先生帶埋保鏢，我嚟嗰陣都昂高頭望，仲用手遮住面，做呢啲嘢嘅人係人渣，浪費警力！」至於E Cup Baby更戴帽作「預防措施」，她接受電話訪問時說：「知道尋（前）晚發生件事，我專登返屋企成晚搵帽，搵到全屋最大嘅帽，除咗可以遮樣，仲可以遮胸。」
劉欣宜寸爆Rainbow
另外，E Cup Baby前晚與李蘊出席工展會活動，即場獻唱，但表現一般，對於鍾蕙芝（Lavina）和胡心諾（Rainbow）推出捧胸性感寫真，她即暗寸：「我血壓低唔敢露，驚心臟病發。」談到o靚模Monique（周凱盈）涉藏毒後，Lavina和Rainbow即劃清界線，她又寸爆說：「吓？佢哋好朋友喎？點會唔熟？會唔會私下仲有聯絡？人做錯事，最需要朋友支持，呢件事可以等Monique知道邊個係真心朋友！」