小小So可以話睇住G.E.M.出道，早排佢舉行處女演唱會，主動邀請小小So去睇，開騷前當然要入後台探佢班。小小So見佢好鬼緊張，就叫佢放心去做，畀啲信心自己，點知佢一上到台就好似「叉爆電」咁款，完全唔怯場。當晚佢嘅演出簡直係超水準，可以話拍得住一班天后歌手。小小So初時都擔心佢跳舞唔掂，因為之前佢呻過冇乜時間排舞兼要跳八首歌，但見佢跳得幾咁自然同冇甩舞步，算係咁㗎喇！
完騷後，小小So入後台讚G.E.M.唱得好，謙虛嘅佢笑笑口話：「腎上腺素分泌嘛！投入咗就有種能力。」佢仲自爆開騷前食咗粒類固醇藥，小小So準備開聲鬧佢之際，G.E.M.即解釋：「開騷前一晚仲係失聲，所以急Call醫生求救，已經盡量用意志克服。」