二十四歲的徐正曦兩年多前由上海移居香港，身為家中獨子的他，很擔心身在家鄉父母的生活。談起早前徐媽媽來港，正曦不禁眼紅紅地說：「臨走前佢係咁叫我去做嘢，唔使送佢機，我哋連攬吓、吻別都唔敢，怕大家都承受唔起別離嘅情緒。」由於前途未卜，他坦言不敢貿然接雙親來港一起生活。沒有親人及好友在身邊，正曦惟有靠電腦及長途電話來維繫感情，幸而努力換來接二連三的演出機會，最近更有機會與郭富城合演《B+偵探》，扮演一個精神分裂的疑犯。

徐正曦熱愛武術，練得一身健碩身形。

徐正曦外形討好，相信不難在娛樂圈發展！

能夠與影帝較量演技，正曦說：「唔應該覺得有壓力，因為會影響演出情緒，況且城城好Nice，好肯同我講嘢，佢可能係我減壓嘅來源。」城城貴為影帝仍如此親民，反而正曦早前遇上同輩出道的演員，卻遭冷眼，感覺難受：「佢唔同所有演員傾偈，又對工作人員態度好差，我好想日後再同佢合作，睇吓佢嘅態度會唔會變囉！」

要拳頭唔要枕頭

戒食兼狂做運動的正曦練得六塊腹肌，雖然外形俊朗，卻很怕在大銀幕上「談情說愛」，他直言「拳頭好過枕頭」。如今操得一口流利廣東話的他，坦言初時「閉關」兩、三個月，日日讀報、查字典及不恥下問，不停向經理人公司同事請教：「最慘係有口難言，自己都表達唔到自己，唔可以同人溝通就最慘嘞！（搵個香港女友教廣東話？）呢個主意都唔錯，考慮吓啦！」