愛爾蘭男子組合Westlife第10張大碟《Where We Are》剛剛面世，各成員製作大碟前都放了一年大假充電，問到Mark如何利用時間？他說：「起初兩個月我放鬆休息，同親友相聚，然後我同男友Kevin周遊列國，去咗泰國、印尼、日本同印度。」

Mark透露新碟中大部分是原創歌曲，與舊作不同，幾乎沒有翻唱作品，製作水準也更為進步，令他感到很自豪。當中一曲《Reach Out》，Mark亦有份創作，他說：「呢首歌係為我朋友而寫，因為我睇到身邊有啲人處於生命入面嘅痛苦時刻，但就唔肯講畀人聽，只係默默承受。我鼓勵佢哋勇於伸出雙手，尋求幫助。」至於新碟中最喜歡的歌曲，要數《Talk Me Down》，Mark說：「我唱咗12年，更加能夠掌握點去表達自己，呢首歌係我休息一年期間為咗好玩而錄，本來冇諗過成為Westlife嘅歌曲，但監製聽過好滿意，所以收錄喺新碟。」

生命無常 及時行樂

此外，問到是否有意與同公司的天籟村姑Susan Boyle合唱？Mark說：「冇！但我哋見過面打過招呼，佢好友善、好純品。」對於同鄉男子組合Boyzone成員Stephen Gately早前不幸逝世，Mark感觸地說：「佢得33歲，實在英年早逝！呢件事提醒我哋生命無常，所以應該及時行樂。」Mark又稱未有意與拍拖5年的Kevin結婚：「一有決定，我第一個會向大家宣布！」