好多藝人嘅成功之道，除咗有「食力」之外，親切待人都好緊要。好似愈忙愈靚嘅蔡卓妍（阿Sa）咁，要同時兼顧唱歌同拍戲，有時仲拍埋台劇添，日日開工十幾個鐘，有時真係攰到得番半條人命㗎！不過，佢從來唔會因為攰而發脾氣，仲好鬼合作添！
早排阿Sa忙住拍戲，又撞啱新碟宣傳，幾乎日日做足廿個鐘，真係想唔得番半條人命都幾難。有一日，阿Sa又喺黃埔為電影開工，佢趁未埋位時諗住閉目養神，咁啱小小So去探班，佢老遠見到已經好Nice咁同小小So打招呼。小小So見佢咁攰，本來唔好意思打擾，點知阿Sa主動走過嚟傾偈：「唔緊要，我仲得㗎！」佢仲愈講愈興奮，直頭好似叉「行」電咁手舞足蹈，仲高舉V字手勢，真係可愛到暈，難怪個個都讚阿Sa係天生食呢行飯啦！