楊千嬅昨日佩戴閃爆的水晶首飾，為Swarovski Crystal Art Piece主持亮燈儀式，身為大會公關的丁子高則於活動前到場打點，惟其後即玩失蹤，避開與老婆合照。席間，大會送上印有丁子高嘜頭的水晶相架，上面更寫有一句「睇唔明」的上海話拼音「Orso Roi Soi Lei se I」（未知是否解作「我好鍾意你呀」），還畫了兩顆心加FOREVER，令千嬅驚喜不已。她冧爆說：「都唔知佢幾時影，不過佢要畫一畫眉！真係好詭異，嚇一跳！（老公送邊份禮物最Sweet？）試過搵人喺水晶挑字！（寫我愛你？）冇咁簡單！係得我同佢明，用古怪拼音考我，估咗好耐！」

千嬅仔細欣賞相架，更露出甜絲絲的表情。

丁子高以上海拼音寫出愛的宣言，果然識冧女！

為個唱押後造人

問到千嬅送甚麼聖誕禮物給老公？她說：「未諗到！或者鬚刨啦！（送溫暖牌？）織過頸巾畀佢，但佢皮膚敏感，都死頂用咗兩日，最終抓到爛晒！其實佢最想要個仔！不過未得住，等我明年十月開埋演唱會先！之後仲要做舞台劇。（幾時得閒造人？）睇天啦！」此外，她坦承購入康樂園給父母居住，明年底擺酒後便會搬往與老公及奶奶同住，正式成為丁家新抱。