善於跳鋼管舞的Enya，為了打扮得靚靚出席樂壇頒獎禮，日前於工作人員陪同下，跟隨Nelson到佐敦一間專賣歐洲時裝的樓上舖置裝。甫到場，Nelson與Enya即兵分兩路，一個負責揀低胸裝，一個則掃5吋高的高踭鞋，準備完畢，Enya即走入窄小的試身室，Nelson則在旁指導。為了扮靚，Enya懶理男女有別，僅穿上一件露出全個胸圍的閃片小背心示人，下身只穿了一條超薄打底褲！
即場擘一字馬
其後，Enya陸續換上超低胸裝及短裙，出現波濤洶湧效果，在Nelson示意下，她即場表演擘髀及踢腳等多個跳舞動作，測試舞衣的彈性，而Nelson則面露笑容，估計戰衣「啱使」！試完兩套衫，Nelson着男助手在自攜的衣包內，取出一件背心芭蕾舞衣給Enya換上，Nelson見她胸前的珠鏈移了位，即用大頭針為珠鏈定位。其後吩咐她擘一字馬，測驗紗裙的長短度及彈性。最後Enya再改穿一條吊帶裙，露出背部的蝴蝶紋身，性感迷人！
試完6、7套衫之後，Enya搞到香汗淋漓兼攰爆，最後埋單走人。為報答Nelson相助，Enya帶他到附近的熟食舖拮魚蛋醫肚，他們各自手執一串魚蛋，不過竟熱情互餵，Nelson對這位新人可謂照顧有加！
打造冶艷舞孃
事後記者聯絡上Enya，問到是否邀得Nelson擔任形象指導？她說：「係呀！Nelson係朋友介紹嘅，我想佢為我塑造一個冶艷中又唔Cheap嘅舞孃形象，順便揀埋去頒獎禮嘅衫！（身材好勁喎？）一般啦！我偶像係蔡依林，我同佢一樣好鍾意鋼管舞，不過我同佢唔同Cup數，我得D咋！（你同Nelson有肌膚之親喎？）我一定唔會同佢傳緋聞，係親如好姊妹嗰種囉！」
Profile
姓 名：謝依穎（Enya）
三 圍：34D、25、35
年 齡：25歲
入行經過：入行前打理家族花卉生意，後因減肥而學跳鋼管舞，最後考獲導師級數，今年正式進軍樂壇。
作 品：最近將在家中練習鋼管舞的短片上網，而處女碟亦已面世。