台灣影壇盛事圓滿結束，小小So最鍾意睇紅地氈嗰Part，個個「峰」騷鬥靚，今年城嫂熊黛林（Lynn）贏開巷，着住Valentino黃色大Deep V晚裝騷身材，搞到小小So流晒口水，之後小小So打畀佢經理人Kim，原來Kim當日都有同行，唔講唔知，見慣大場面嘅Lynn原來一步一驚心！
小小So：Lynn嗰晚好性感喎！
Kim：係呀！佢認為最緊要效果靚，性感都唔緊要！為咗今次出席都揀咗好耐，見到呢條裙就好鍾意！
小小So：行紅地氈感覺點呀？
Kim：超級緊張！畢竟第一次出席金馬獎，好難忘！
小小So：件衫咁性感，唔怕走光咩？
Kim：唔會！我哋做好晒準備工夫。
小小So：今次最難忘係咩？
Kim：Lynn話見到張曼玉最開心，原來佢係Fans嚟㗎！仲好開心將「最佳動作設計」獎頒畀《葉問》，因為佢有份演出，真係好感動。
小小So：Lynn加入影壇，好快有獎攞啦！
Kim：希望啦！佢對做戲都愈嚟愈有興趣，承你貴言啦！