人氣歌手鄧紫棋（G.E.M.）昨日「處女下海」擔任金水壽司剪綵嘉賓，6位數字袋袋平安。剛完成處女個唱的她透露，身體出現「異變」：「尋晚沖涼後瘦咗0.8kg，之前個唱減咗13磅，完騷勁擦又肥6磅，好唔穩定！」她坦言因磅數不穩，搜羅頒獎禮戰衣時有困難：「唔會好性感，因為減咗肥，依家冇乜嘢睇，之前個唱想唔着黑色Leggings，但做唔到，仲有三個星期，希望努力爭取！」

此外，G.E.M.賣口乖表示希望為壽司店拍電視廣告，卻被司儀森美「攔截」，笑言要爭做代言人，G.E.M.說：「口才我唔夠森美好，咁我作廣告歌啦！義不容辭！」問到身價有否隨人氣而升，她說：「最緊要開心，有得食就更加好，唔講錢！」有新一代地獄廚神之稱的她透露，曾下廚整壽司，但烏龍百出：「低能咗啲，用咗屋企啲飯，人哋整嗰啲係凍，我嗰啲係熱嘅！」

G.E.M.的造型可愛又趣怪，Kawaii呢！	G.E.M.的新Look十足Lady GaGa，前衞有型！	G.E.M.恨為壽司店拍廣告，卻遭森美「攔路」。

扮BB GaGa拍廣告

另外，G.E.M.在Blog中透露早前為某電器公司拍攝新一輯廣告，以6個新造型示人，更模仿美國新進天后Lady GaGa的潮爆Look，笑言是「BB GaGa」！早前她特別抽空返回上海探望祖父母及舅父，又與精靈可愛的表弟玩樂。