郭富城

自從郭富城澄清與王秀琳關係後，熊黛林的「城嫂」地位可謂更加鞏固，她「峰」騷亮相金馬獎，而城城亦罕有地讚賞︰「超級名模着乜都靚！」

解讀：「富黛」打得火熱，聽到人起晒雞皮，城嫂以後唔使買靚衫，反正着乜城城都讚靚。真係要講句︰「你是最漂亮的！你知道嗎？」

張家輝

張家輝金像之後又到金馬稱帝，事業創高峰，但他自爆聽宣布時心情緊張︰「宣布時心跳加速，差啲猝死。」

解讀：家輝唔使咁緊張，身體要緊！你仲有老婆同囡囡要養，做咗影帝我都戥你開心，但學雯女話齋唔在乎獎仲好，起碼唔使咁大壓力。

樂基兒

身為名模的黎太樂基兒，衣着品味當然不用懷疑，對其他人衣着亦要求高，最近她分享穿衣之道，竟當眾彈老公黎明品味差︰「佢冇乜Taste，都係Tee加牛仔褲！」

解讀：黎天王梗係Casual啦，賺嘅錢都畀晒黎太買衫，仲邊有多餘錢買衫畀自己！黎太咁講唔驚返屋企畀老公話咩？

張智霖

張智霖早前對太太袁詠儀今年有份角逐「視后」潑冷水說︰「如果TVB肯頒視后畀佢，我實批個頭落嚟當櫈坐，再免費幫佢拍十年劇集！」結果由鄧萃雯奪得視后。

解讀：其實Chilam唔使玩到咁大，佢老婆雖然冇攞到視后，就算攞咗都唔會批佢個頭落嚟，冇人要佢兌現承諾，佢仲要靠個樣搵食o架！

謝安琪

已為人妻的謝安琪，思想原來這麼開放，與樂隊Mr.開騷時竟寸主音Alan︰「我覺得佢係喺洗手間除晒衫望住塊鏡，見到啲嘢諗起《森林》呢首歌！」

解讀：都做咗人老婆仲咁講嘢，唔怕教壞囝囝，都諗吓其他小朋友！Alan首《森林》係咩用意，你會唔會諗多咗。

傅穎

傅穎曾經因走音被人批評到冇信心唱歌，轉新公司出新碟忘記舊時不快，想不到她連舊歌也不唱︰「希望好快有新歌畀大家聽，畀啲新鮮感大家。」卻否認擔心走音才不唱。

解讀：忘記過去係好事，大家都唔想聽到你走音，不過唔使連舊歌都唔唱，畀新鮮感好簡單，練好啲歌乜都得。