黎耀祥及鄧萃雯榮升視帝視后之後，竟突然傳緋聞，兩人均表示「得啖笑」，昨日他們分別接受電台節目電話訪問，祥仔表示開心，因20多年都未傳過緋聞，對於有指雯女冧他，他說：「冇所謂啦！（佢慶功踩場同你合照！）一大班人玩好開心。（好似陳奕迅同謝安琪咁有排搞？）有人注意先係好，20幾年都冇人注意，突然攞嚟炒作，我同雯女唔會避忌，之後好多合作，都要溝通。」提到成為三料視帝，是否要改名「黎料」？他說：「花名啫！（做無綫一哥？）唔敢當，喺TVB大家好平等。」他坦言得獎翌日已往拜祭母親：「話咗畀佢知，冇佢教導我冇今日。」

讚老婆明白事理

雯女亦指碰見黎太時亦不會尷尬：「之前我同祥仔登台，佢肉緊同我講，話我同佢老公好襯，我未見過咁開放嘅太太，佢老婆知我哋合作有化學作用，好難得有咁明白事理嘅太太。」

兩人昨日接受本報訪問，祥仔說：「我同雯女成日一齊出席活動，佢有SMS畀我，之後都唔會尷尬，我哋12號都要去澳門。（酬勞收貴咗？）少少啦！」雯女說：「大家咁支持我哋，就唔好信啲傳言。」另外，《萬千星輝頒獎典禮2009》平均收視達40點，最高43點，新劇《巴不得爸爸》首周收31點。