李克勤的囝囝李立仁（Ryan）今年10月剛滿兩歲，早前曾坦言希望為囝囝追個細佬妹的他，最近終如願以償，與太太盧淑儀再度成功造人！雖然心情興奮，但因太太懷孕未足三個月，為怕BB小器而遲遲不敢公布喜訊。不過，前日生日的他，於踏入42歲的第一天即「勇敢」公布喜訊：「我老婆又有喜了！」雙喜臨門的他笑言，最近發現屋企附近埋伏了很多「狗仔隊」，故自覺太太懷孕的秘密已遭揭穿：「可能係走漏風聲，因為我有啲私人事，不過既然係開心事，就一次過公開話畀大家知！」

努力搵食幫補家計

明年榮升「虎爸爸」的他難掩興奮心情，邊笑邊說：「呢個喜訊我只係講咗畀譚生（譚詠麟）同屋企人知，辛苦阿倫幫我保守秘密！」他更自爆為了保守秘密向親友講大話，詐病缺席大小飯局及約會：「真係要向親友們講聲『唔好意思』，之前怕BB小器，所以未講得住，我幫太太詐病避席親友聚會，希望大家唔好怪我！」

此外，克勤表示明年做大佬的「大仔」Ryan比他更興奮：「阿仔知道有多個弟弟或妹妹都好高興，雖然未知仔定女，其實都冇所謂，一樣咁錫！」不過，多個人豈止多雙筷，故他揚言以後要「努力搵食」，因為家庭負擔加重，並乘機宣傳新碟：「月底我出新專輯，大家幫幫手買多幾隻，幫補吓家計！仲有我和阿倫嘅『左麟右李』，都要大家多多支持！」

叮囑傳媒錫住愛妻

他又表示不介意公布喜訊，與大家分享喜悅，只希望家人的生活不受影響：「如果大家見到我老婆，麻煩離遠啲影相，唔好嚇親佢！我唔可以經常喺佢身邊照顧佢，麻煩大家幫手照顧佢！每隔兩個月我會畀個詳細報告大家，唔使咁辛苦呆等，大家放心！」