同荷蘭籍男友打得火熱嘅孫燕姿，早排嚟香港為巡迴演唱會造勢，據講燕姿今次嘅行程好緊密，除咗一落機就要去首飾活動，之後兩日由朝到晚都要做訪問，但佢竟然可以喺百忙之中Shopping，因為好多名店已經收工，燕姿連平價時裝店都唔放過，呢位亞洲天后真係冇架子又平民化喇！
小小So見燕姿做完訪問已經成夜晚九點幾，照計應該又攰又肚餓，但燕姿寧願捱吓肚餓，都要振興香港經濟，仲要一入去時裝店就行足兩個鐘先夠喉，真係樂而忘返！聽講燕姿買完好有滿足感，大讚啲衫又平又靚，之後買完嘢先至拉大隊醫肚，今次香港之旅，認真滿載而歸！
