本文重點
去年的金馬影帝張涵予，昨日與徐靜蕾現身上海，以代言人身份出席瑞士名錶英納格專賣店開幕暨承載光影星耀聖誕活動，獲品牌中國區總經理高鼎國親自招待，地位超然。張涵予即席為宣傳海報揭幕，對於騷胸肌拍攝，他說：「鍾意做帶氧運動，最肥試過145磅，依家有131磅。」而他最近因有份投資的華誼兄弟上巿進帳逾三千萬元，他直認不諱：「股價隨時有高有低，金錢對我嚟講係唔好貪心，你哋問我點花，我都冇計劃！」
珍藏無價古董床
不過，熱愛收藏古董的他，有意買木頭和明式家具收藏：「或者買古董啦！屋企已經有三十幾件，有一張床仲係無價寶，係有五百幾年歷史嘅晚宋床，唔瞓得㗎！喺01年用四萬幾美元買，唔會賣出去，除非博物館有興趣，我都會捐出去！」
談到在《十月圍城》中演繹孫中山一角，張涵予透露形象由來自荷里活的造型師操刀：「戲份拍咗一個星期，不個每日要用七個鐘嚟化妝，包括戴頭套、黐面。」
另外，同場的徐靜蕾回應黃立行對她有好感之說，問到對方是否理想對象？她說：「除咗我，佢係好多女仔嘅理想對象，當宣傳啦！」此外，高鼎國對於張涵予加入成為代言人，他說：「以影帝價簽佢做代言人，佢拍《風聲》之前已簽落，如果唔係仲貴。」對於早前有傳品牌與徐靜蕾合作有問題，徐靜蕾說：「係小誤會，依家繼續合作。」
