江若琳（Elanne）前晚出席慶祝東亞運開幕活動，吸引近百歌迷撐場，為配合主題，Elanne化身跨欄選手及啦啦隊成員，玩問答遊戲時，有小妹妹舉手上台作答，Elanne即攬實對方，更獲小妹妹送吻，氹得她開心地說：「今晚帶你返屋企。」

抗拒忘年戀

聖誕節將至，問到有沒有男士約她？Elanne說：「有嘅，不過聖誕接咗好多騷，冇時間出去。（錯過機會？）講真，冇乜機會識到異性，因為圈子好窄，又唔出去飲嘢同蒲，希望真命天子快啲出現啦！」Elanne坦言喜愛運動型男生，問到郭富城是否符合其擇偶條件？她說：「佢係偶像，冇諗到咁遠。（唔鍾意佢咁花心？）太遙遠喇！加上我唔喜歡對象大過自己十年，因為會有代溝。」

獲小女孩送吻，氹得江若琳笑逐顏開。

Elanne憑着甜美笑容俘虜萬千少男心，感情卻未有着落。

Elanne入行以來不乏緋聞，但全部得個傳字，問她是否擇偶條件太高？Elanne說：「又唔係喎！其實冇人夠膽約我就真，一出街就會畀人望住，好大壓力。（Dry？）真係好Dry，加上工作太忙，冇時間畀我拍拖。」將於下月十五日舉行處女演唱會的她透露，每晚返家忙於拉筋，她說：「晚晚都喺梳化做一字馬，媽咪投訴話我霸晒成張梳化。」