昨日謝天華與陳法拉出席《龍翔黃大仙「蝶變展新姿」揭幕禮》，對於好姊妹楊怡得獎後被網民狂插，法拉力撐說：「我冇留意網民咁樣話阿怡，但我會撐我嘅好姊妹。（佢向你訴苦？）我哋多數講女仔嘢，少講公事，亦唔會傾呢類傳聞。（你露Bra都冇獎？）每個劇都有付出，我寄望出年，任何獎都鍾意。」
勇奪男配角獎的謝天華則慨嘆未有時間慶祝：「攞完獎日日開工，未有時間同屋企人慶祝！（太太送乜禮物？）送杯水我都開心，我工作排到出年六月，希望攝到時間同太太去旅行。（攞唔到『我最喜愛的電視男角色』黑面？）我明明笑緊，唔知點解寫我黑面！」
