陳奕迅（Eason）、謝安琪（Kay）、譚詠麟（阿倫）、李克勤、陳慧琳（Kelly）、劉美君及台灣歌手梁文音等前晚出席《Uni-Power大合唱會》，身穿金銀色衫的Eason搶盡風頭，過江龍梁文音穿上低胸連身裙露「警鐘胸」，成為最性感女歌手。因音樂會部分收益撥捐「香港思覺失調學會」，學會創辦人谷祖琳及谷德昭以嘉賓身份上台分享感受。

全程冇交流的Eason及Kay合唱完才擊掌。

打扮搶眼的陳奕迅High爆懶理Kay。

避忌拒行埋

音樂會開場時，環球歌手大晒冷合唱《人人英雄》，縱使Kelly、阿倫、克勤及劉美君四位殿堂歌手企在第二排正中位置，但焦點仍落在頭排中間位的Eason及Kay，雖然兩人並肩站立，但全程欠交流，直至合唱快歌《青春無晦》時，Eason依然眼尾都唔望Kay，陶醉地在台上跳來跳去。至音樂會尾聲，所有歌手齊集台上獻唱阿倫的經典歌，由於大家手翹手邊跳舞邊唱《星球本色》，Kay大方翹着Eason右手，唱罷Eason即彈開兼獨自行另一通道落台。

Eason自爆被阿倫取笑：「佢話我件衫又金又銀，完騷可以攞去燒，唔介意佢咁講，百無禁忌，只要唔好搞我屋企人咩都冇所謂！」問到為何未能站在「殿堂級」位置？Eason笑說：「證明我仲有進步空間。」對於王菲計劃開個唱，問到會否自薦做嘉賓？Eason說：「睇佢個唱內容，唔係個個都想同我唱，不過我都恨同佢合唱，有呢個機會一定唔會錯過。」有「口水佬」之稱的Eason坦言以吹水來抒發情緒。