楊思琦啱啱拍完無綫新劇《翻叮一族》，但傳出唔少是非，有指佢淪為「三線」花旦情緒失控而犯眾憎。不過小小So就收到另一個更真實嘅版本，根據《翻》劇幕後「和哥」同小小So講，唔止對手陳鍵鋒對付楊思琦，就連身為阿姐嘅商天娥都玩埋一份，搞到同劇嘅夏雨都避之則吉。
小小So：楊思琦向來都係「辣椒仔」，有人敢惹佢咩？
和 哥：係「辣椒仔」又點！今次個角色唔出，發唔到圍囉！有次思琦同陳鍵鋒對稿嗰時，仲畀對方對付，激到思琦出唔到聲。
小小So：鍵鋒份人平時文質彬彬，講嘢好斯文㗎喎？
和 哥：睇對邊個啦，連娥姐都玩埋一份㗎，有次佢話思琦企位唔啱，激到思琦要衝出廠抖氣，搞到同劇嘅「老戲骨」夏雨都聞到「燶味」，大家同場拍嘢嗰時，夏雨即表明立場話：「你哋點都好，拍咗我啲先！」