黎耀祥與鄧萃雯雖然有信心成為今年「視帝」、「視后」贏家，但仍不忘大讚對手陳豪及毛舜筠！祥仔自言勝算有八、九成：「輸贏都冇所謂，角色受歡迎，得到咁多人支持好滿足，又帶畀我好多，同攞獎冇乜分別。」話雖如此，祥仔仍表示攞獎可以將事情完美化：「係為劇組而攞，獎勵大家咁辛苦。」祥仔視陳豪為勁敵，直言並不是因為《宮心計》呼聲高而看好對方，而是覺得他演技很犀利！
至於雯女以平常心看待「視后」：「贏就皆大歡喜，輸就習以為常。（輸慣咗？）事實上係未攞過！」雖然看淡得失，但雯女仍做足準備及諗定致謝詞。問到心目中的「視后」對手，雯女直指是毛舜筠：「我唔會投自己一票，好似好奇怪！其實全部劇我都冇睇過，好難判斷，不過我最欣賞毛姐，佢有劇出街我一定擔定櫈仔睇，頭五集《畢打自己人》我都有錄低，餓咗佢嘅劇好耐喇！」