今年視后之爭相當激烈，佘詩曼和楊怡分別憑《宮心計》的「劉三好」及「姚金鈴」，成為視后熱門人選，硬撼頂頭大熱「四奶奶」鄧萃雯，而本報昨日率先爆黎耀祥和鄧萃雯奪視帝視后。

所以阿佘和楊怡不約而同缺席拜神儀式，難免令人揣測是否已打定輸數，楊怡否認：「梗唔係啦！因為今（昨）日去咗拍廣告，先去唔到拜神儀式。」談到《宮》劇收視理想，若然拿不到視后，會否感到不值？她說：「唔係用收視嚟衡量女主角表現嘅！」至於今年增設「最佳表現獎」，楊怡原來毫不知情：「吓？係咩？都唔知有咁嘅獎！（似豬肉獎？）咁又唔覺得，多啲人攞獎，就皆大歡喜。」

輸贏一樣開心

初演奸角的楊怡，是視后熱門中，資歷較淺的一位，她坦言有份角逐已是「升呢」，問到有否信心？她說：「坦白講，雯女係我心儀嘅視后，因為佢做戲好生活化，唔似演緊戲，我好佩服佢，我冇諗過輸贏問題，有固然開心，冇獎一樣替人高興。」

阿佘則解釋昨日要出席《72家租客》記者會，又要影電影海報和拍攝MV，故缺席拜神儀式：「呢啲係公司安排。」而她亦否認打定輸數，問到若然並非雯女獲獎，而由她奪得，會否夠膽攞獎？阿佘說：「假設性嘅問題唔答。（你成為民調熱門？）唔使揣測，好快知答案。」對於「最佳表現獎」是否安慰獎？阿佘說：「每個獎背後都有意義。」

「個個都係對手」

阿佘表示會以平常心看待攞獎，不想給自己太大壓力，談到雯女氣勢如虹，阿佘說：「個個都係對手，冇分主唔主要對手，入得圍嘅都做得好。（有期望？）相信冇人參加比賽會抱失望心情，我唔想去估，就好似生BB咁，我唔會做掃描，生仔抑或生女到時大家都有驚喜。」

另外，有份角逐視帝的陳豪則表示看好黎耀祥：「『柴九』角色歷程好豐富，而且祥仔覺得一直冇機會做主角，今次真正可以證明佢係有實力。」