傅明憲（Gigi）錫佢嘅愛犬錫到燶就係人都知，早前佢隻狗比目魚獲獎，佢將比目魚打扮到鬼火咁靚，仲專登親手織咗頸巾畀佢添！不過小小So知道佢另一隻愛犬饅頭就冇咁好彩，因為佢日前病咗，令Gigi非常擔心！
Gigi：早幾日我帶饅頭出街，雖然已經着咗好多衫，可能天氣涼，加上又橫風橫雨，所以佢返到屋企之後病咗！
小小So：病得好嚴重？
Gigi：係呀！佢燒到104度，不過人同狗嘅體溫唔同，一般狗正常體溫係101至103度，但係饅頭係老狗，所以一發燒就好嚴重，成身震晒！仲冇力行去飲水添！
小小So：你照顧佢真係辛苦！
Gigi：係呀！我真係一步都唔敢離開佢，又要餵佢食嘢同畀水佢飲。經過今次我得到好大嘅教訓，以後只要天氣唔好，就算畀幾多衫隻狗着，我點都唔會再帶佢哋出街！