台慶劇《宮心計》收視爆燈，「兩宮太后」謝雪心與韓馬利（Mary）、「兩房元首」關菊英與米雪憑着劇中的精湛演技，順理成章入圍今年「最佳女配角」候選名單。不過，四人談起獎項卻表現得相當謙虛，除了互笠高帽外，還不約而同表示最期望《宮》劇奪得「最佳劇集」。

韓馬利獲提名已開心

四位候選人中，以心姐及菊姐的呼聲較高。雖然心姐以《巾幗梟雄》的「大奶奶」角逐獎項，但《宮》劇的「太皇太后」帶挈她人氣急升，亦令她對奪獎有信心。不過，心姐坦言位位候選人獲獎也是實至名歸：「好多網民追悼太皇太后嘅死，得到觀眾支持，感覺已經贏咗。今次個個對手嘅演技毋庸置疑，可以同佢哋連場好戲已經心滿意足！」菊姐亦激讚對手：「如果叫我揀，個個都咁好真係揀唔落手！心姐氣燄十足，米雪古裝造型維肖維妙，而Mary姐演繹經常畀人蝦嘅太后又恰到好處，所以得獎與否都冇所謂，反而最想個劇攞最佳劇集獎，咁即係個個都得獎！」

上屆「視后」米雪亦和應菊姐，期待《宮》劇奪最佳劇集，以表揚其他綠葉演員如李國麟、蔣志光、張國強與李麗麗等的精湛演出。至於自言信心不大的Mary姐則說：「其實心姐、菊姐、米雪個個實力都唔只係配角，可以同佢哋一齊成為大熱人選，已經好開心！」Mary姐指獎項雖是一個鼓勵，但做演員並不是為爭獎，最重要是努力磨合，令劇集更精彩。