緋聞傳出多時的舒淇與張震,關係疑幻疑真,兩人昨晚現身澳門LV首間旗艦店開幕,擔任大會剪綵大使的舒淇以真空露背春裝示人,並戴上價值約761萬元的鑽石手鐲,她笑言會「屈」大會送手鐲,雖然得到萬千寵愛,更獲LV高層全程攬腰傍實,卻被「傾慕」多時的張震大派檸檬,令她很冇癮。
舒淇先與高層進行剪綵和祝酒儀式,其後與張震和桂綸鎂合照,舒淇一直表現風騷,更自爆冧張震,加上早前張父張國柱曾讚舒淇為人努力,似乎已得到「老爺」歡心,她又愈講愈多,直指張震喜歡圈外人,令她受委屈。
「我哋成日都拍拖」
記:記者 舒:舒淇
記:想唔想同張震拍拖?
舒(風騷):我哋成日都拍拖,係畀你哋寫到咁。
記:有冇發展可能?
舒:梗係有啦!每一個未結婚嘅異性都有可能,Timing(時機)係幾時就好難講。
記:張震係咪你鍾意嘅類型?
舒:都鍾意o架!我哋係好朋友,好有默契,佢又靚仔又有才華,好符合我條件。
記:傳佢好花心喎!
舒:佢就係鍾意出面(圈外)嘅女仔,唔鍾意我,所以我好委屈。
記:佢單身喎!
舒:佢成日都單身,得閒就單身。
記:咁你係咪Available?
舒:我哋係好朋友,十幾年喇!拍戲時候已經識啦!亦一齊幫LV去澳洲宣傳,之前拍《最好的時光》共處五個月,有一段刻骨銘心嘅愛情,彼此好了解。不過如果你哋再問我同佢之間嘅緋聞,佢一定反面,因為佢覺得又問呢啲嘢。
記:你依家想拍拖?
舒:係女仔都想啦!不過太忙,冇時間建立感情,依家我仲係事業衝刺期。
記:羨慕好似張曼玉咁?
舒:佢依家唔使拍戲啦!我亦未遇到啱嘅男仔,每個人生活都唔同,如果有一個男友等女友三、四個月都OK,但暫時未知,我亦唔會為愛情放棄事業,因為工作係我興趣。
「佢都鍾意好多男仔」
對於舒淇對張震的愛意表露無遺,以一身總值六萬元西裝打扮的張震,得悉後大感驚訝,當記者要求他與舒淇合照,二人更「避忌」婉拒。
記:記者 張:張震
記:舒淇話再講你哋嘅緋聞,你會反面。
張(一頭霧水):佢反面先!
記:你爸爸讚舒淇喎!
張:係咩?唔知喎!
記:你爸爸話畀你警告佢唔好再講感情事。
張:鬧乜嘢鬧啫!都唔係有咁嘅事。
記:你阿爸話你同舒淇好襯?
張(語氣決絕):可能佢覺得啱,我覺得係朋友。
記:有冇發展機會呀?
張:大家係朋友,識好耐,合作咗好多次。
記:咁舒淇係咪你鍾意嘅類型?
張:佢又靚又聰明,大家都係藝人,好多嘢可以傾,發展就唔知,我冇諗呢件事情。
記:舒淇話拍拖要講Timing?
張(一臉驚訝):好難講,愛情Timing好緊要,但自己冇諗太多,隨緣分啦!
記:舒淇話你鍾意出面啲女仔,自己好委屈。
張(再驚訝):佢都鍾意好多男仔,其實鍾意人好正常!
文:專案組 攝:謝國華澳門傳真